Hevserokê Partiya Yekîtiya Demokratîk (PYD) Şahoz Hesen têkildarî êrîşên dewleta Tirk li ser herêmên Bakûr û Rojhilatê Sûriyê ji ANHA re axivî destnîşan kir ku: “Heger sînorek ji êrîşên dagirkeriya dewleta Tirk re neyê dayîn wê li dijî şerê tinekirina DAIŞ bandorek mezin bike û li dijî çareseriya pirsgirêka Sûriyê bibe asteng û wê herêmê zêdetir aloz û tevlihev bike.”
‘Êrîş li ser çareseriya pirsgireka Sûriyê ye’
Şahoz Hesen di destpêka axaftina xwe de anî ziman ku dewleta Tirk a dagirker eşkere dijminatiya xwe li hember Rojava ye Kurdistanê û herêmên demokratîk yên Bakur û Rojhilatê Sûriyê dike.
Hesen wiha axivî: “Bi rasthatina hemleya dawî ya şerê li dijî DAIŞ’ê û salvegera piştgiriya roja Kobanê a cîhanê de ev êrîşên dewleta Tirk bi plan û zanebûn tên kirin. Li Bakur û Rojhilate Sûriyê aşitî, aramî, jiyana hevbeş û azadiya gelan di asta bilinde ye. Dewleta Tirk a dagirker li dijî wê tecrubeya Bakur û Rojhilatê Sûriyê bê tehamûl e û dixwaze vê tecrûbeya demokratîk têk bibe.
Nêzîkatiya dewleta Tirk nijadperest û yekperest e. Li gorî zagonên navnetewî êrîşên dewleta Tirk sûcin. Li Efrînê jî ev bi awayek vekiriya xûyabû. Dewleta Tirk a dagirker siyaseteke qirkirinê, gûhartina demografîk, tecawuz û dagirkerî li ser esasê tinekirina gelê Kurd û hemû gelên Bakur û Rojhilatê Sûriyê pêk tîne. Ji ber wê dewleta Tirk a dagirker bi hemû şêwazên qirêj êrîşî herêmen rizgarkirî dike.”
‘Hedefgirtina sivîlan rewşekî cidî û xeter ê’
Şahoz Hesen bi bîrxist ku gelê Kobanê û şervanên azadiyê di berxwedana Kobanê de dîrok nivîsandin û pêvajoya paşxistina DAIŞ bi berxwedanê re dan destpê kirin û wiha got:
“Berdewamiya pêvajoya tinekirina DAIŞ îro li Derazorê didome. Dewleta Tirk a dagirker tinebûna DAIŞ naxwaze û hewild dide ku DAIŞ’ê ji rewşa xeter derbixe. Siyaseta dewleta Tirk li ser qirkirina gelan li pêş dikeve û ji bo vê jî rojnemavan, jin û zarok tên hedef girtin. Li dijî DAIŞ’ê hemû gelên Sûriyê bûne yek û li berxwe dan. Niha jî berxwedan û têkoşîna gelan li hember dagirkirina Efrîn û Rojava ye Kurdistan û Bakurê Sûriyê de didome. Êrîşên dewleta Tirk a dagirker; hêz, yekitî, armanc, berxwedan û têkoşîna me xurttir dike. Li her çar parçeyên Kurdistanê dewleta Tirk a dagirker zarok û jina hedef digre. Dewleta Tirk siyasetekê hovîtî, qirêj, li dijî mirovahiyê dide meşandin û bi hişmendiya DAIŞ’ê tev digere. Hedefgirtina dewleta Tirk ji sivîlan re rewşekî cidî û xeter e.”
‘Daxuyanî giring in lê pêwîstê helwestên tund bên dayîn’
Şahoz Hesen di berdewamiya axaftina xwe de anî ziman ku pêwîste li dijî siyaseta dewleta Tirk ku qirkirina gelan armanc dike werê sekinandin û helwestên tund werin dayîn.
Li ser mijarê Hevserokê PYD’ê Şahoz Hesen wiha got: “Dewleta Tirk a dagirker di propagandaya xwe de dibêje ku hêzên bakukê suriyê êrîşî me dikin. Ev gotinên wan ji rastiyê dûr in. Ya rast ew e ku ew êrîşî gelê me dikin. Îspatê we jî şahadeta sivîlan e.
Bêdengiya dewletan ji dagirkeriyê re nayê qabûlkirin. Têkildarî êrîşên dewleta Tirk de Fransa daxuyanî da. Dayîna daxûyaniyan girîng in, lê pêwîstê helwestên tund ku yên pêşiya êrîşan bi girin bên dayîn. Êrîşên dewleta Tirk a dagirker binpêkirina hemû hevpeymanên navnetewî li hember DAIŞ’ê ne. Ji ber ku ev hevpeyman li ser esasê têkoşîna li dijî DAIŞ’ê hatibûn çêkirin. Pêwîste hêzên navnetewî bi berpirsyartî û bi biryareke zelal ji bo parastina herêmên rizgarkirî xwedî helwest bin.”
‘Heger sînor ji Tirkiyê re neyê dayîn wê hebûna DAIŞ dewam bike’
Şahoz Hesen bal kişan li ser têkiliyên dewleta Tirk û DAIŞ û got: “Erdogan dixwaze tola DAIŞ’ê rabike. Her tim yên ku alikarî û piştgiriya DAIŞ’ê kiriye dewleta Tirk e. Êrîşên ku niha dewleta Tirk li hember Bakurê Sûriyê li pêş dixe hebûna DAIŞ diparezê. Ev ji bo mirovahiyê rewşekê xeter e. Heger sînorek ji êrîşên dagirkeriya dewleta Tirk re neyê dayîn wê li dijî şerê tinekirina DAIŞ bandorek mezin bike. Her wiha li dijî çareseriya pirsgireka Sûriyê alozî û tevlihevî we derbikeve.”
‘Çavgirtina êrîşan serweriya Sûriyê dixê bin xeteriyê’
Şahoz Hesen bêdengiya rejîma Sûriyê ji êrîşên dewleta Tirk a dagirker re şermezar kir û got: “Rojane hin berpirsyarên Rûsya û rejîma Sûriyê daxuyaniya didin û dibejin gerek yekparçebûna axa Sûriyê were parastin. Lê dewletekî wekî Tirkiyê êrîşî axa Sûriyê dike mixabin rejîma Sûriyê tu helwestî nîşan nade. Ev jî nîşan dide ku yan dewleta Tirk û rejîma Sûriyê têkildarî êrîşên li ser Sûriyê giştî lihev kirine yan jî ev êrîş li hesabê rejîma Sûriyê tê. Bi van şêwazan serweriya Sûriyê naye parastin. Dagirkerî di qanûnên navnetewî de sûcin. Pêwîstê rejîma Sûriyê derhaqê sûcê ku dewleta Tirk dike de doz veke û bi erkên xwe rabe. Lê berovajî vê Rejîma Sûriyê tu helwest li dijî êrîşan diyar nake û çavên xwe ji êrîşan re digre. Her wiha rejîma Sûriyê bi van nêzîkatiyaên xwe zemîn ji êrîşên dewleta Tirk re ava dike.”
‘Hemû deskeftiyên xwe li dijî êrîşan biparêzin’
Hevserokê Partiya Yekîtiya Demokratîk (PYD) Şahoz Hesen di dawiya axaftina xwe de diyar kir ku, pêvajoyek nû di Bakur û Rojhilatê Sûriyê de destpê kiriye û rewşa çareseriya Sûriyê ketiye rojeve û got: “Îradeya siyasî ya Bakûr û Rojhilatê Sûriyê hatiye merheleyeke ku di nav pêvajoya çareseriya aloziya Sûriyê de cihê xwe bigre. Lê êrîş û xeteriyên mezin li ser sîstema Netewa Demokratîk hene. Ji bo wê jî, deskeftiyên ku heya niha me bi dest xistine ku em bi karîbin li hember hemû êrîşan; bi têkoşîn û berxwedaneke mezin bi parêzin wê demê emê çareseriya qeyranê jî mîsoger bikin.”
