21’ê Sibate rocê ziwanê dayê yê dinya ancî ame, derbas bi û ziwanê ma ancî qedexe yo!
Çiyoke eyro zerre merdimî dicneno no yo ke ma asîmîlasyonê serdestan ro xo agyernayo otoasîmîlasyonî û ma nê rewşî ra zî zehf razîbîyaye eysenê!
Di na se serra 21’ine de ke Peymanê sey UNESCO û peymanê bînî yê ke heqê bikarardişê ziwanê dayê sey heqêke muhîm ey merdimî vînenê dewre de yê û îmzaye dewlete Tirkîye bi xo binê nê peymanan de esta. La hemverê nê awayî zî qedexeyê aye yê ziwanê Kurdî ser de bi zêdehî verdewam keno. Nê qedexeyê ke hetê komara Tirkiye ra nizdê se serre yo kewtê dewre di rayveberîya hikûmatê eyroyî de zî bi zêdeyî yenê verdewamkerdişî. Na desthilatîya ke goşê xo waştişê perwerdehîya bi ziwanê Kurdî rê ke heqêke esasî yê her merdimî yo kerr kerdê û rojnameyan ra bigî heta kanalê TV’yan weşênayîşê ke bi ziwanê Kurdî yê temam qedexe kerdê û dayê qefelnayîşî. Senîn ke na desthilatî pay dana heqanê bingehînan ê şarê Kurdî ser eynî awayî peymananê mîyanneteweyî û gerdûnî yê derheqê ziwanan de ke îmzaye înan binde esta zî binling kena. Asîmîlasyon û qedexeyo ke epey zirar dayo ziwanê Kurdî ro, eyro zî bi qedexe û otoasîmîlasyonî zirarê xo zêdneno.
Raşt o ma heta vacê mudaxileyê neyînî yê desthilatî ziwanê ma ser de virazyayo la lazim o ma nê raştî zî bivînê ke ma zî hetê hesasîya ziwanê xo de bê xem ê û rewşê ey ê ke tede yo ra razîbîyaye eysenê. Xebatê ziwanî yê nê des serrê peyînan ke hetê heskerdoxanê ziwanî ra ameyê kerdişî tenê di saziyan de bisînor mendê û nêrisayê hedefo ke semedê payramendişê ziwanêke lazim o. La eke ma raştî vacê rocê ma yê eyroyî de ziwanê Kurdî ke asta otoasîmîlasyonî de yo bi xebatanê heskerdoxanê ziwanî tenê nêfeletêno. Ziwanê ma yo ke çerxê otoasîmîlasyonî de mengene beno ancax bi wayîrvetişê şarê ma nê çerxî ra bifeletyo. Birîna ziwanê ma kûr a û bi pîrozkerdişanê çend rocanê ziwanî, bi çend sazîyan yan zî çend koman derman nêbena. Ma zanê na dethilatî asîmîlasyon bi mêrdan da destpêkerdişî û bi cinîyan/dayan da verdewamkerdişî. Ancî qedexeyê ziwanî kuçeyan de dest pê kerd û keyan de ame zêdnayîşî û rewşo ke eyro ziwanê ma kewto ci rewşêke xetere yo.
Dermanê na birîna ziwanê ma di şiknayîşê otoasîmîlasyonî de yo. Dermanê ziwanê ma keyede bi Kurdî qiseykerdişê dayan bi tûtanê xo dir o, dermanê ziwanê ma bazar û çarşîyan, sazî û partîyan de, cayê karan, kuçe û parkan de bi Kurdî qisekerdiş o. Wexta ma sey şarê Kurdî heme awayî ra wayîr ro ziwanê xo bivecîyê go desthilatê tekparêzî zî mecbûr bimanê ke lingêke hetê serbestîya ziwanî ser de berzê. Hema ke zêde nêbîyo erey ma xo ra dest pê bikerê û têkoşîna xo ya ziwanî xelek bi xelek hîra bikerê û ziwanê xo biersinê cayo ke layîq o. Vinîbîyayîşê ziwanî vinîbîyayîşê neteweye merdimî yo, eke ma nêwazenê neteweyê ma vinî bo lazim o ma ziwanê xo vinî nêkerê. Ziwanê merdimî rihê merdimî yo, eke ma nêwazenê ma rihê xo ra bibê lazim o ma ziwanê xo ra dûrî nêkoyê. Bi hêvîya ke aşma vernîya ma aşma serbestîya ziwanê Kurdî û wedartişê tecrîdî bo û serra vernîya ma serra averşîyayîşê ziwanê Kurdî bo Rocê Ziwanê Dayîke yê Dinya ro şarê Kurdî pîroz bo.
